Su presidente de sa Regione, Ugo Capellacci, at propostu a sa Giunta una delìbera pro pòdere impreare su bilinguismu finas in s’istemma ufitziale de sa Regione Autònoma de sa Sardigna. 

Su provedimentu est istadu aprovadu dae sa Giunta e apostivigat s’impreu de iscritziones bilingue in su portale istitutzionale de s’amministratzione. S’istemma in duas limbas,(sardu e italianu), duncas at a bènnere impreadu in sos giassos temàticos, in sos ispetziales, in sa posta eletrònica e in totu sas fainas gràficas chi marcant sas atividades de s’ente istitutzionale, finas cussas chi sunt ligadas a sa partetzipatzione de sa Regione Autònoma de Sardigna, a fieras, rassignas, cunvegnos a livellu natzionale e internatzionale.

“Custa est una faina in lìnea cun sa dibata chi b’est como in su Parlamentu”  si leghet in una nota  chi pertocat sa ratìfica de sa Carta Europea de sas Limbas Regionales e Minoritàrias, intre sas cales b’est finas sa limba sarda. Partit pròpiu dae innoghe  sa proposta de aprontare in sardu e in italianu s’istemma de sa Regione, cun sa punna de marcare sa ispetzialidade linguìstica de sa Sardigna e finas sas cunditziones de sa limba de s’ìsula nostra.